Учениците од четврто и петто одделение во 100 основни училишта низ државата ќе стекнуваат основни знаења од програмирање, сајбер безбедност и вештачка интелигенција преку користење на micro:bit уреди, во рамки на проектот „Училишта на 21 век – Фаза 2“.
Почетокот на проектот денеска беше означен во основното училиште „Коста Рацин“ во Брвеница. Иницијативата се реализира во партнерство меѓу Министерството за дигитална трансформација, Британскиот совет и Македонски Телеком, со вкупна поддршка од над 350.000 евра.
Проектот ќе се спроведува од мај 2026 до јули 2027 година и ќе опфати повеќе од 20.000 ученици на возраст од девет до десет години, како и околу 1.000 наставници од одделенска настава.
Наставниците ќе поминат специјализирани обуки за користење на micro:bit уредите и современите дигитални алатки во наставата, додека учениците ќе развиваат вештини за програмирање, критичко размислување, решавање проблеми и основни концепти поврзани со вештачката интелигенција.
Министерот за дигитална трансформација, Стефан Андоновски, истакна дека целта е децата да не бидат само пасивни корисници на технологијата, туку да научат како да создаваат и да ги користат дигиталните алатки за решавање реални предизвици.
„Проектот ќе биде наменет за цела Македонија и опфаќа 100 училишта и повеќе од илјада наставници кои ќе се обучат за користење на micro:bit уредите во наставата. Учениците од четврто и петто одделение ќе учат основи на програмирање и сајбер безбедност, а уредите ќе можат да се применуваат во сите наставни предмети“, изјави Андоновски.
Во рамки на партнерството, Македонски Телеком ќе опреми и пет училишта со нова компјутерска опрема. Првата донација беше реализирана токму во училиштето „Коста Рацин“ во Брвеница.
Проектот предвидува и онлајн консултации, micro-курсеви и два Coding Challenge настани, на кои учениците ќе имаат можност да ги претстават своите идеи, креативност и стекнато знаење.
„Училишта на 21 век – Фаза 2“ има за цел да придонесе кон модернизација на образованието и подготовка на младите за идниот пазар на труд, преку развивање на аналитичко размислување, технолошка писменост, креативност и иновативност.
