Учениците од ООУ „Киро Глигоров“ од 4. до 9. одделение ќе учат онлајн поради градежни работи

Учениците од четврто до деветто одделение во ООУ „Киро Глигоров“ во Општина Центар учебната 2026/2027 година ќе ја започнат со онлајн настава поради градежните активности што сè уште се одвиваат во дел од училишниот објект.

— реклама —

Активностите се реализираат во рамки на Проектот за унапредување на основното образование (ПЕИП), чиј носител е Министерството за образование и наука. Иако според првично планираната динамика работите требало да завршат пред почетокот на учебната година, тие сè уште не се завршени.

Поради тоа, училиштето побарало учениците од четврто до деветто одделение привремено да следат настава од далечина. МОН дало согласност за ваквиот начин на реализација на наставата до создавање услови за нејзино безбедно одвивање со физичко присуство.

— реклама —

Градоначалникот на Општина Центар, Горан Герасимовски, порача дека безбедноста на учениците е приоритет и дека очекува градежните работи да завршат во најкус можен рок.

— реклама —

„Најважно е децата да бидат безбедни и наставата да започне без дополнителни одложувања. Бидејќи градежните активности што ги реализира Министерството за образование и наука сè уште не се завршени, учениците од четврто до деветто одделение времено ќе следат онлајн настава“, изјави Герасимовски.

Тој додаде дека од МОН е побарана информација за точниот рок и динамиката на завршување на работите, со цел учениците што побрзо да се вратат на настава со физичко присуство.

Општина Центар најави дека ќе ја следи состојбата и ќе остане во комуникација со училиштето, родителите и Министерството за образование и наука.