Училиштето во канадскиот град Tumbler Ridge, во кое во февруари се случи една од најсмртоносните пукотници во историјата на земјата, ќе биде срушено, соопштија властите на Британска Колумбија. Одлуката за уривање на средното училиште е донесена по состаноци на училишниот одбор со жртвите, членовите на семејствата и локалната заедница, соопшти премиерот на Британска Колумбија Дејвид Еби.
„Сакаме да бидеме сигурни дека правиме сè како што треба за преживеаните, за семејствата и за луѓето од Tumbler Ridge. Училишниот одбор слушна многу јасна порака дека учениците, наставниците, вработените и другите сакаат нова локација“, наведе Еби.
Девет лица беа убиени, а десетици беа повредени откако напаѓачот Џеси Ван Роотселаар отвори оган за време на настава во февруари. Напаѓачот подоцна бил пронајден мртов со повреди што си ги нанел самиот. Полицијата по нападот во училиштето пронашла шест мртви лица, додека уште две жртви биле пронајдени во куќа поврзана со напаѓачот.
Масакрот длабоко ја потресе Канада, а неколку дена по трагедијата Еби на комеморација ѝ вети на заедницата дека младите од Tumbler Ridge повеќе никогаш нема да мора да се вратат во зградата на училиштето во кое се случил нападот.
„Ќе ви обезбедиме безбедно место за школување“, рече тој тогаш на настанот на кој присуствуваа политички лидери од целата земја. Училиштето ќе биде срушено во текот на летото, а новото ќе се гради на друга локација во тој оддалечен планински град.
Средното училиште Tumbler Ridge остана затворено од пукањето, но дел од учениците посетуваат настава во привремени монтажни училници поставени на училишниот имот.
„Како покраинска влада сме посветени на тоа новото училиште да го изградиме што е можно побрзо“, рече Еби, додавајќи дека проектот ќе го помогне и федералната влада.
„Кога премиерот беше во Tumbler Ridge со мене и градоначалникот, вети дека федералната влада ќе учествува во овој проект, а сега тоа и го потврдија“, нагласи тој.
Еби изјави дека заедницата во последните месеци покажала „херојство“, „храброст“ и „отпорност“ по незамисливата трагедија што го погоди рударскиот град. „Ќе работиме на тоа децата од Tumbler Ridge да добијат безбедно и пријатно место за враќање во училиште“, напомена тој.
