УХМР најавува разведрување: Дожд наутро, сонце попладне и до 24 степени

Променливо облачно време со повремен локален дожд во утринските часови, а потоа сончево со мала облачност најавува Управата за хидрометеоролошки работи (УХМР) за денеска. Температурите ќе бидат релативно високи за овој период од годината, со дневни максимуми од 19 до 24 Целзиусови степени.

— реклама —

Во текот на денот ќе дува слаб до умерен ветер, а долж Повардарието на одредени места повремено ќе се засилува од северозападен правец.

Во Скопје претпладне ќе биде променливо облачно, додека во вториот дел од денот се очекува сончево време со мала облачност. Ќе дува слаб до умерен ветер од променлив правец, а максималната температура ќе достигне 20 степени.

— реклама —

Утрово најстудено било на Попова Шапка, каде што се измерени само 3 степени, додека во Лазарополе температурата се спуштила на 5 степени. Во Маврови Анови, Битола и Крушево биле измерени 6 степени, а во Крива Паланка 7 степени.

— реклама —

Во Охрид, Виница и Прилеп утринската температура изнесувала 9 степени, во Куманово, Тетово, Штип и Струмица 10 степени, а на мерната станица Зајчев Рид во Скопје 11 степени. Најтопло утрово било во Гевгелија со 14 степени.

Во изминатите 24 часа најмногу дожд наврнал во Крива Паланка, каде што се измерени 21 литар на квадратен метар. Во Виница наврнале 9 литри, во Берово 8, во Куманово 4, а во Штип и Лазарополе по 1 литар на квадратен метар.

Според прогнозата на УХМР, по утринските врнежи следува постепено разведрување и претежно сончево време во поголемиот дел од земјата.