Универзитет „Св. Кирил и Методиј“ денеска со свечена академија и доделување награди на најдобрите дипломирани студенти од академската 2024/2025 година одбележа 77 години од своето основање и патрониот празник – 24 Мај, Денот на Светите Кирил и Методиј.
На свеченоста се обратија ректорката на универзитетот Биљана Ангелова и министерката за образование и наука Весна Јаневска, која истакна дека УКИМ претставува еден од најголемите двигатели на македонското образование и на државата во целина.
„Генерации студенти низ амфитеатрите на факултетите станувале врвни професионалци, научници, лекари, инженери и уметници. Тоа е најголемата вредност на универзитетот“, рече Јаневска.
Таа посочи дека важноста на образованието и знаењето останува клучна за личниот и општествениот развој и нагласи дека Владата во последните две години обезбедила рекорден буџет за образованието и науката.
Според министерката, средствата што ги добива УКИМ се зголемиле од три милијарди денари во 2024 година на речиси пет милијарди денари оваа година.
Јаневска истакна дека Министерство за образование и наука и УКИМ изградиле партнерски однос и активно соработуваат во подготовка на нови законски решенија, научноистражувачки проекти и реализација на целите од Стратегијата за паметна специјализација.
Во обраќањето, таа упати и повик до академската заедница за поголема вклученост во надминување на општествените предизвици, како што се врсничкото насилство, заштитата на животната средина, етничките поделби и зачувувањето на културниот идентитет.
