Со отворањето на првиот преговарачки кластер, Украина и Молдавија и официјално влегоа во нова фаза од процесот на пристапување кон Европската Унија, правејќи важен исчекор на патот кон полноправно членство.
Одлуката беше потврдена на состанокот во Луксембург, каде што претставниците на ЕУ оценија дека двете земји направиле значителен напредок во спроведувањето на реформите, и покрај сериозните политички и безбедносни предизвици со кои се соочуваат.
Европската комесарка за проширување, Марта Кос, истакна дека напредокот на Украина е особено важен ако се има предвид дека земјата паралелно води војна и работи на усогласување со европското законодавство и стандарди.
Отворањето на преговорите претходно беше блокирано поради политички несогласувања меѓу земјите-членки, но овојпат Унијата постигна консензус и даде едногласна поддршка за продолжување на процесот.
Високата претставничка на ЕУ за надворешна политика и безбедност, Каја Калас, оцени дека станува збор за важна пресвртница во европската перспектива на двете држави.
„Ова е резултат на тешки реформи спроведени во исклучително сложени услови. Членството на Украина и Молдавија ќе придонесе за посилна Европа“, изјави Калас.
Од Европската комисија очекуваат во наредниот период да започнат разговори и за останатите пет преговарачки кластери, доколку земјите-членки повторно дадат согласност.
Иако отворањето на преговорите претставува историски момент, патот до полноправно членство останува долг и сложен. Украина и Молдавија ќе треба да исполнат бројни критериуми поврзани со владеењето на правото, реформите во институциите, економските стандарди и целосното усогласување со европското законодавство.
