Украинските Сили за беспилотни системи соопштија дека во изминатите 12 дена погодиле 159 пловни објекти кои, според Киев, припаѓаат на таканаречената руска „флота во сенка“, користена за транспорт на нафта и стока со цел заобиколување на меѓународните санкции.
Командантот на единицата, Роберт „Маѓар“ Бровди, објави дека само во текот на ноќта кон петок биле погодени уште 12 пловни објекти во рамките на операцијата наречена „Молочко“. Според неговите информации, девет од нив биле товарни бродови, еден танкер, еден брод за транспорт на гас и еден влечен брод.
Бровди тврди дека од 6 до 17 јули биле погодени вкупно 159 пловни објекти, од кои 117 во Азовското Море и 42 во Црното Море.
Според украинската страна, целта на операцијата не е потопување на бродовите, туку нивно онеспособување за да се прекине руската поморска логистика без да се предизвикаат еколошки последици. Бровди наведува дека целта е да се парализира транспортот на нафта, гориво и товар што, според Киев, се користи за заобиколување на санкциите.
Тој претходно објасни дека акцијата е насочена кон таканаречената „feeder“ флота – мали и средни танкери кои ја пренесуваат нафтата преку каналот Волга-Дон и Азовското Море до поголеми танкери во Црното Море. Според него, онеспособувањето на овие бродови го отежнува транспортот на нафта, како и снабдувањето со гориво кон Крим.
Киев ја оправдува операцијата со образложение дека руската „флота во сенка“ обезбедува приходи за финансирање на руските воени активности и затоа претставува легитимна воена цел. Вицепремиерот Олексиј Кулеба во писмо до Меѓународната поморска организација (IMO) ги отфрли руските обвинувања дека Украина изведува терористички напади врз трговски бродови и, истовремено, ја обвини Русија дека од почетокот на инвазијата нападнала 59 трговски пловни објекти.
Од друга страна, рускиот министер за надворешни работи Сергеј Лавров ги осуди украинските напади, оценувајќи дека тие претставуваат „чист тероризам“, а не пиратство. На тие обвинувања Бровди кратко возврати преку Telegram со пораката: „Не е пиратство, Лавров, туку работа. Ваша, крвава.“
