Украинските сили погодиле два танкери од, како што ја нарекуваат, руската „флота во сенка“ во Азовското Море, како и два лансери на противвоздушниот систем С-400 и радарски систем на Крим, тврди командантот на украинските Сили за беспилотни системи, Роберт Бровди.
Бровди, познат по прекарот „Маѓар“, на Телеграм објави дека секој од танкерите превезувал околу 7.000 тони гориво од руското пристаниште Таганрог кон Крим.
Според неговите наводи, украинските сили во текот на ноќта меѓу 5 и 6 јули извеле напади врз вкупно 47, како што наведе, „легитимни воени цели“ во заднината на руските сили и на територијата на Русија.
Тој тврди дека бил погоден и склад за гориво во Керч, на Крим, каде што избувнал пожар, оценувајќи дека нападот е дел од поширока кампања насочена кон руската логистичка инфраструктура што ги поддржува воените операции на полуостровот.
Бровди, исто така, наведува дека за време на руските ракетни напади врз Украина биле уништени два лансери на противвоздушниот систем С-400 „Триумф“ – едниот во Брјанската област во Русија, а другиот на Крим. Според неговите тврдења, уништен е и радарскиот систем „Небо-У“ на Крим.
Украинскиот командант оцени дека ноќната операција е дел од континуираните напори на Украина за слабеење на руската воена логистика и противвоздушна одбрана.
Тврдењата на украинската страна засега не се независно потврдени, а руските власти сè уште не се изјасниле за наводите.
