Украинците ги покривале телата на убиените руски војници со гранки за да ги измамат дроновите – детали за тајната операција „Вивалди“

Украинската војска со месеци во тајност спроведувала голема контраофанзива на истокот на земјата, наречена „Операција Вивалди“, во која, според украинските воени извори, до средината на октомври биле ослободени 277 квадратни километри територија и 16 населени места во секторот Лиман, во северниот дел на Донецката област, објави „Киев индипендент“.

Операцијата ја спровеле бригади под команда на Третиот армиски корпус, со цел да ги зацврстат украинските одбранбени позиции пред зимата и да ги зачуваат преостанатите упоришта во Донбас. Но, зад напредувањето стоеле исклучително тешки борби, мински полиња и тактики со кои украинските војници се обидувале да останат незабележани од руските беспилотни летала.

Една од најголемите пречки биле противпешадиските мини, поставени во голем број на правците по кои се движеле украинските единици. Командантот на баталјон од 66. механизирана бригада, Сергиј Галченко, со повикувачки знак Психо, изјавил дека дури 80 проценти од украинските загуби во операцијата биле предизвикани од противпешадиски мини.

За да ги избегнат утврдените руски позиции, украинските војници применувале необична тактика. Во мали групи, најчесто по двајца, ноќе се движеле зад руските линии, понекогаш навлегувајќи и до пет километри во длабочина. За да го намалат ризикот да бидат откриени со термовизиски камери, се покривале со термални ќебиња.

— реклама —

Нивната задача била да ги пресечат патиштата за снабдување, пристигнувањето засилувања и повлекувањето на руските единици.

Командант од 60. механизирана бригада, познат под повикувачкиот знак Џудо, раскажал дека војниците добиле наредба да не отвораат оган додека руските војници не им се приближат на само пет метри. По нивното ликвидирање, телата ги покривале со гранки и лисја за руските извидувачки дронови да не забележат дека во нивната заднина се поставени украински заседи.

Борбите за одделни населени места траеле со недели. Особено тешки биле судирите за селото Шандрихолове, кое зафаќа само 0,17 квадратни километри и во кое имало педесетина уништени куќи. И покрај малата површина, борбите траеле повеќе од еден месец, бидејќи руските сили изградиле мрежа подземни засолништа во подрумите на разурнатите објекти.

— реклама —

Триесет и седумгодишниот украински војник Олександр, со повикувачки знак Маринец, опишал како неговата тричлена група успеала да премине река и минско поле, но веднаш потоа била забележана од руски извидувачки дрон.

Следувал повеќечасовен напад со беспилотни летала, при што војниците четири часа трчале меѓу урнатините, обидувајќи се истовремено да ги избегнат дроновите и мините.

„Искрено, бев убеден дека ќе нè убијат“, раскажал Олександр.

Тројцата преживеале, но се здобиле со потрес на мозокот и повреди од шрапнели кога еден од дроновите удрил во вратата на објектот само една секунда откако успеале да ја затворат.

— реклама —

Операцијата ги покажала и ограничувањата на роботските копнени возила што се користат за евакуација на ранети војници. Според украинските команданти, тие се движеле премногу бавно и лесно станувале цели на руските дронови.

Во еден случај, тешко ранет украински војник бил поставен на роботско возило за да биде извлечен од бојното поле. По поминати околу километар и половина, возилото било погодено од руски дрон, а војникот загинал.

Интензитетот на нападите го илустрира и сведоштвото дека за само два часа против група од шест украински војници биле употребени 35 FPV-дронови управувани преку оптички кабел, 12 дронови од типот „Молнија“ и тешка артилерија.

Важна улога во украинската операција имал и 21. посебен полк за беспилотни системи „Кракен“, чии летала напаѓале руски складишта за муниција, гориво и бази за поправка на техника на оддалеченост до 200 километри во окупираните делови на Луганската област.

Според тврдењата на командата на Третиот армиски корпус, во операцијата биле исфрлени од борба околу 8.000 руски војници, а повеќе од 250 биле заробени. Украинската команда тврди дека односот на загубите бил еден спрема седум во корист на Украина, при што најголемиот дел од украинските загуби биле ранети војници. Овие бројки не се независно потврдени.

Бригадниот генерал Андриј Билецки го означил завршувањето на оваа фаза од операцијата со пораката дека „четирите годишни времиња на Вивалди завршија, но музиката продолжува“.

Украинските команданти оценуваат дека главната цел на операцијата е постигната, но очекуваат воените активности да забават со приближувањето на зимата.