Меѓународната агенција за атомска енергија (МААЕ) изрази сериозна загриженост откако руската државна компанија за нуклеарна енергија „Росатом“ соопшти дека украински дрон погодил објект во нуклеарната централа Запорожје, најголемата во Европа.
Од МААЕ информираа дека за инцидентот биле известени од раководството на централата, која се наоѓа под руска контрола.
Генералниот директор на агенцијата, Рафаел Маријано Гроси, предупреди дека ваквите инциденти претставуваат закана за основните принципи на нуклеарната безбедност за време на вооружени конфликти.
„Напаѓањето на нуклеарни постројки е како играње со оган“, порача Гроси.
Според МААЕ, станува збор за прв напад со дрон во рамките на периметарот на централата од април 2024 година. Агенцијата побарала пристап до погодената турбинска зграда за да може нејзините експерти директно да ја проценат штетата и околностите под кои се случил инцидентот.
Од агенцијата додаваат дека засега нема информации за повредени лица, ниту пак е пријавена штета на нуклеарните системи на електраната.
МААЕ најави дека дополнителни информации ќе бидат објавени откако нејзиниот тим ќе изврши увид на терен и ќе ги утврди сите детали поврзани со инцидентот.
