Украински дронови во текот на ноќта извршија голем напад врз Санкт Петербург и околната Ленинградска област, при што биле погодени нафтен терминал и пристанишна инфраструктура, соопштија руските власти.
Гувернерот на Санкт Петербург, Александар Беглов, изјави дека градот бил цел на масовен напад со беспилотни летала и дека бил погоден градскиот нафтен терминал. Според него, нема загинати или повредени, а последиците од нападот веќе се санирани.
Гувернерот на Ленинградската област, Александар Дрозденко, соопшти дека дронови го погодиле и пристаништето Висоцк, кое се наоѓа на околу 170 километри северозападно од Санкт Петербург, на брегот на Финскиот Залив. Пристаништето се користи за претовар на нафта, жито, јаглен и течен природен гас.
Според Дрозденко, во текот на ноќта над Ленинградската област биле соборени 72 дрона.
Напади имало и во Псковската област, каде што, според локалните власти, биле пресретнати повеќе од 30 беспилотни летала. Пријавена е помала материјална штета, како и неколку повредени лица, меѓу кои и работници во фабрика во градот Велики Луки.
Украина во текот на годинава ги интензивира нападите врз руската енергетска инфраструктура, додека Санкт Петербург, кој се наоѓа на околу 900 километри од територијата под украинска контрола, повремено е цел на напади со дронови.
