Русија, која се соочува со недостиг на гориво по серијата украински напади врз енергетската инфраструктура, се подготвува да увезе најмалку 200.000 барели авионско гориво од Јапонија преку трговски посредници, објави „Ројтерс“, повикувајќи се на добро информирани извори.
Според информациите, пратката треба да биде натоварена во јапонското пристаниште Чиба во првата половина на јули, по што ќе биде транспортирана до Јужна Кореја. Таму, најверојатно во близина на пристаништето Јосу, горивото ќе биде префрлено на друг танкер, кој потоа ќе отплови кон Русија. Засега не е познато кое ќе биде крајното одредиште на пратката.
Руското Министерство за енергетика, како и надлежните институции во Јапонија и Јужна Кореја, сè уште не се огласиле по повод овие информации.
Недостигот на гориво во Русија е последица на зачестените украински напади со беспилотни летала врз рафинерии и складишта за гориво. Поради тоа, во повеќе руски региони се воведени ограничувања за продажба на гориво, а земјоделците предупредуваат дека состојбата може да ја загрози жетвата.
Податоците на компанијата „Кплер“ покажуваат дека последен пат Русија увезла авионско гориво во февруари 2022 година, кога од Јужна Кореја биле испорачани околу 22.000 барели.
Во меѓувреме, рускиот извоз на авионско гориво годинава е намален на околу 13.000 барели дневно, што е повеќе од двојно помалку во споредба со минатата година, кога изнесувал околу 30.000 барели дневно.
