Хакер украл речиси 4.000 биткоини, вредни околу 340 милиони долари, во еден од најголемите познати напади врз криптовалути годинава, но потоа направил нешто што ретко се гледа во вакви случаи – вратил најголем дел од украдените средства.
Станува збор за напад врз Liquid Network, мрежа што ја користат повеќе криптоберзи, а која во 2018 година ја покрена криптокомпанијата Blockstream. Од мрежата соопштиле дека таканаречен „white hat“ хакер ги повлекол средствата од нејзиниот паричник, по што работата на мрежата била прекината додека се решава случајот.
Идентитетот на хакерот не е познат. Според извештаите на криптомедиумите, тој ја искористил грешката во системот за да ги повлече средствата, а потоа порача дека ќе ги врати доколку Blockstream ја отстрани безбедносната слабост.
Поранешниот извршен директор на Blockstream, Самсон Моу, објави дека грешката била отстранета, по што околу 3.400 од приближно 4.000 украдени биткоини биле вратени.
Сепак, околу 600 биткоини, чија вредност е околу 47 милиони долари, сè уште се под контрола на хакерот.
Моу наведе дека мрежата ќе остане запрена додека не се спроведат дополнителни поправки и безбедносни подобрувања пред повторното активирање.
Кражбата се вбројува меѓу најголемите досега забележани кражби на дигитални средства, според листата на Rekt, која ги следи ваквите инциденти.
