Севернокорејски хакери осомничени за најголемата кражба на криптовалути во историјата

Севернокорејска хакерска група најверојатно стои зад најголемата кражба на криптовалути досега, при која од најголемата светска криптоберза „Бинанс“ биле украдени околу 6,3 милијарди долари. Најголемиот дел од средствата исчезнале за само 20 минути, а анализите на повеќе компании за сајбер-безбедност упатуваат на групата „ТрејдерТрејтор“, поврзана со режимот во Пјонгјанг, објави Ројтерс.

Американската компанија „ТРМ Лабс“ со висок степен на сигурност го поврзува нападот со оваа група. До слични заклучоци дошла и „Чејнализис“, додека „Елиптик“ открил врски со претходни кражби за кои исто така се осомничени севернокорејски хакери.

— реклама —

Иако американските власти и „Бинанс“ сè уште не го потврдиле официјално идентитетот на напаѓачите, наодите на повеќе независни компании упатуваат на истата група. „ТрејдерТрејтор“ претходно беше поврзана и со нападот врз криптоберзата „Бајбит“ во 2025 година, кога беа украдени околу 1,5 милијарди долари.

Според анализата на „ТРМ Лабс“, напаѓачите префрлиле приближно 6,36 милијарди долари од дигиталните паричници на „Бинанс“ на десет различни блокчејн-мрежи. Поголемиот дел од трансакциите биле извршени во период од само 20 минути, во четвртокот навечер.

— реклама —

Подготовките за нападот траеле најмалку 36 часа. Хакерите најпрво направиле неколку помали пробни трансакции, а потоа ја започнале главната операција. Истражителите утврдиле дека успеале да преземат контрола врз системот што ги одобрува трансферите на криптовалути, со што овозможиле префрлање на средствата кон адреси под нивна контрола.

Од „Бинанс“ првично соопштиле дека нападот можеби започнал со компромитирање на лаптопот на еден од нивните инженери, но дополнителната истрага открила и други точки на пробивање. Компанијата наведува дека засега нема докази дека биле украдени приватни клучеви од дигиталните паричници.

Сомнежите за вмешаност на Северна Кореја се засноваат и на поврзаноста со претходни напади. „Чејнализис“ открил дека дел од украдените средства почнале да се мешаат со пари од претходен напад врз криптоберзата „Битгет“, за кој исто така се сомневаат дека го извршиле севернокорејски хакери. „Елиптик“ потврдил дека дел од средствата завршиле на адреса поврзана со тој напад.

— реклама —

Севернокорејските хакерски групи со години се поврзуваат со големи кражби на криптовалути. Според американските и меѓународните истражители, украдените средства претставуваат еден од изворите за финансирање на режимот на Ким Џонг-ун, вклучително и неговите воени и нуклеарни програми.

„Бинанс“ и неговите партнери успеале брзо да замрзнат околу три милијарди долари од украдените средства, главно во стабилни криптовалути чии издавачи можат да блокираат трансакции. Сепак, околу 3,3 милијарди долари останале надвор од дофатот на таквите мерки, проценува „Елиптик“. Дел од нив би можеле да бидат запрени доколку завршат на берзи што соработуваат со истражителите.

Во истрагата се вклучени ФБИ и американската Тајна служба, а „Бинанс“ соработува со истражните органи во повеќе земји. Компанијата соопшти дека ќе ги покрие загубите со сопствени средства и од резервниот фонд, нагласувајќи дека имотот на корисниците останува безбеден.

Доколку се потврди одговорноста на Северна Кореја, оваа кражба би можела речиси двојно да ја зголеми вкупната вредност на криптовалутите што досега ги украл режимот, според проценката на коосновачот на „Елиптик“, Том Робинсон.