Рекордна кражба во криптосветот: Хакери ја нападнаа „Бинанс“ и украдоа 6,3 милијарди долари

Криптовалути во вредност од неверојатни 6,3 милијарди долари биле украдени од „Бинанс“, најголемата криптоберза во светот, во напад што аналитичарите го поврзуваат со Северна Кореја, објави Ројтерс. Кражбата, која се смета за една од најголемите во историјата на дигиталните средства, предизвика пад на цените на криптовалутите и загриженост за безбедноста на средствата на централизираните берзи.

Нападот се одвивал во период од околу 20 минути, почнувајќи доцна во четвртокот. Компаниите за анализа на блокчејн-трансакции TRM Labs и Chainalysis соопштија дека со висок степен на сигурност одговорноста ја поврзуваат со Северна Кореја и нејзината хакерска единица.

— реклама —

Според првичните наоди, нападот можеби започнал преку компромитиран лаптоп на еден од инженерите на „Бинанс“, преку кој напаѓачите добиле пристап до системот и овозможиле неовластено префрлање средства кон паричници под нивна контрола.

Од „Бинанс“ соопштија дека средствата на корисниците се безбедни и дека компанијата ќе ги покрие загубите. Досега се лоцирани околу три милијарди долари, а повлекувањето средства требало да биде повторно овозможено во следните 48 часа. Компанијата не ја соопшти состојбата со преостанатите 3,3 милијарди долари.

— реклама —

„Вашите пари се безбедни и ќе ја покриеме секоја загуба“, изјави коизвршниот директор Ричард Тенг.

Речиси половина од украдените средства биле замрзнати со помош на издавачите на стабилни криптовалути. Tether замрзнал речиси 1,57 милијарди долари, Circle повеќе од 800 милиони долари, додека и World Liberty Financial и Ripple презеле мерки за блокирање на дел од средствата.

— реклама —

Веста предизвика пад на криптопазарот. Биткоинот се спушти на најниско ниво во последните шест недели, од 76.368 долари, додека етериумот падна за повеќе од три проценти, достигнувајќи двомесечен минимум од 2.178 долари. Токенот BNB, поврзан со „Бинанс“ , забележа пад од пет проценти.

Последиците се почувствуваа и кај акциите на компании поврзани со криптопазарот. Акциите на Coinbase паднаа за 4,8 проценти, иако компанијата соопшти дека не била погодена од нападот, додека акциите на Strategy забележаа пад од речиси шест проценти во продолженото тргување во САД.

„Бинанс“ има 335 милиони регистрирани корисници ширум светот, а според годишниот извештај за 2025 година, на платформата се чувале средства во вредност од околу 162,8 милијарди долари. Компанијата има и посебен фонд за заштита на корисниците од една милијарда долари, кој се чува во биткоини.

Експертите предупредуваат дека нападот може дополнително да ја намали довербата во криптовалутите и да ги натера инвеститорите повторно да ја преиспитаат безбедноста на средствата што ги чуваат на централизираните берзи.