Управата за хидрометеоролошки работи (УХМР) соопшти дека вчера биле измерени исклучително силни удари на ветер на повеќе локации низ Македонија, при што на дел од мерните места биле регистрирани вредности приближни до историските рекорди.
Според податоците од Националната мрежа на автоматски метеоролошки станици, од вкупно 47 мерни места, олуен ветер со брзина од 62 до 88 километри на час е измерен на 12 локации, силна олуја со брзина од 88 до 102 километри на час на шест мерни места, орканска олуја со брзина од 102 до 117 километри на час на едно мерно место, додека на три автоматски метеоролошки станици бил регистриран оркански ветер со брзина поголема од 118 километри на час.
Најсилен удар на ветер е измерен на автоматската метеоролошка станица во Штип, каде што во 17 часот е регистрирана брзина од 134 километри на час со правец запад-северозапад.
Во Скопје, на автоматската метеоролошка станица во Скопската Котлина, во 16:10 часот е измерен удар на ветер од 130 километри на час со правец север-северозапад. Иста брзина од 130 километри на час е регистрирана и на автоматската метеоролошка станица во Ново Село, Струмица, во 17:50 часот, каде што ветерот дувал од северозападен правец.
Од УХМР потсетуваат дека оркански ветер, според класификацијата за јачина на ветер, е ветер со брзина поголема од 118 километри на час. Станува збор за исклучително ретка појава на овие простори, која може да предизвика сериозни оштетувања и значителни материјални штети.
