Клиничката болница во Штип ги извести здравствените установи од Источниот регион во наредниот период да не испраќаат пациенти со скршеници на Одделението за ортопедија, кое е надвор од функција поради оштетувањата предизвикани од силното невреме.
Од болницата соопштија дека елементарната непогода предизвикала сериозни оштетувања на Одделението за ортопедија и на ортопедската операциона сала, поради што пациентите нема да можат да добијат соодветен третман сè до завршување на санацијата.
„Ве замолуваме во следните денови, до целосното отстранување на штетите, пациентите со скршеници да не ги упатувате во Клиничката болница Штип. Потребно е тие да бидат препраќани во други здравствени центри каде што ќе им биде обезбеден соодветен третман“, наведуваат од болницата.
Оштетувањата настанаа откако силниот ветер, кој според податоците достигнал брзина од 134 километри на час, урна дел од кровната конструкција на болничкиот објект.
Заменик-директорката на Клиничката болница Штип, Билјана Ефтимова, информираше дека меѓу 15 и 20 пациенти, кои биле сместени на Одделението за ортопедија, се префрлени на други одделенија во болницата.
Во текот на денот, стручни екипи извршиле проценка на штетите со цел што поскоро да започне санацијата на покривот и повторно да се воспостави нормално функционирање на Одделението за ортопедија.
