Уште нема потерница по Ива Михајлова, МВР чека на судот - претседателот го нема со одговор цел ден

За Ива Михајлова, која замина во Бугарија и покрај судските забрани за напуштање на Кочани и преминување на државната граница, до Министерството за внатрешни работи сè уште не е доставена наредба за распишување потерница од Основниот суд Кочани. Ова е официјалниот одговор што „Скопје1“ го доби од МВР, речиси 12 часа по информациите за нејзиното заминување во Бугарија.

„За лицето Михајлова Ива до МВР на РСМ досега нема пристигнато наредба за распишување на потерница од Основен суд Кочани“, одговорија од Министерството за внатрешни работи за „Скопје1“.

— реклама —

Истовремено, претседателот на Основниот суд Кочани, Спиро Борисов, не одговара на прашањата што редакцијата ги испрати во врска со случајот. По првичното барање информации, „Скопје1“ испрати и нов сет прашања, со кои побара објаснување дали е распишана потерница, дали судот го известил надлежниот јавен обвинител за новонастанатата ситуација и дали се определени нови мерки за обезбедување на присуството на обвинетата.

До објавувањето на текстот, одговор од претседателот на судот нема.

— реклама —

Претходно, Обвинителството потврди дека на Михајлова, по предлог на јавен обвинител, уште на 9 октомври 2025 година ѝ биле одземени двете патни исправи, македонската и бугарската. Дополнително, ѝ биле изречени забрана за преминување на државната граница со лична карта, забрана за напуштање на Кочани и обврска да се јавува кај службено лице.

Од Обвинителството нагласија дека ризикот од бегство бил една од клучните причини поради кои повеќепати давале негативно мислење за барањата за враќање на патната исправа.

„Надлежниот јавен обвинител ги презеде сите чекори во негова надлежност за обезбедување на лицето, а ризикот од бегство беше една од клучните основи поради кои Обвинителството повеќепати даваше негативно мислење во однос на барањето за враќање на патната исправа“, соопшти Обвинителството.

— реклама —

Во меѓувреме, портпаролот на МВР, Гоце Андреевски, потврди дека во македонскиот систем за гранична контрола нема евидентиран излез на Михајлова од државата.

Проверки биле извршени и преку Заедничкиот контакт-центар со Бугарија, при што бугарската гранична полиција информирала дека нема евидентиран ниту легален влез на Михајлова на бугарска територија.

— реклама —

Според официјалните гранични евиденции, последниот регистриран влез на Михајлова во Бугарија бил во септември 2025 година, а во октомври истата година бил евидентиран нејзин излез од Бугарија и влез во Македонија.

Наспроти овие информации, адвокатот на Михајлова во изјава за бугарската телевизија НОВА тврдеше дека заедно поминале преку официјален граничен премин, со документи и без никакви пречки.