Уставен суд на Република Македонија денеска на 9. седница донесе одлука за поништување на Законот за изменување на Законот за платите на судиите („Службен весник на Република Македонија“ бр.39/2026), оценувајќи дека истиот е спротивен на Уставот.
Како клучни аргументи во одлуката, Судот го истакна значењето на финансиската независност и самостојност на судството, како составен дел од уставно загарантираната независност на судската власт, но и темелните вредности на уставниот поредок – владеењето на правото и поделбата на власта.
Судот утврдил дека по поведувањето на постапката за оценување на уставноста, Собранието не постапило согласно претходните укажувања, туку дополнително ги намалило коефициентите за платите на судиите со измените од февруари 2026 година. Поради тоа, Судот по сопствена иницијатива ја проширил постапката и го поништил законот.
Во образложението се наведува дека ваквите измени се спротивни на член 8 став 1 алинеи 1, 3 и 4, членовите 51 и 54, како и на Амандманот XXV од Уставот.
Дополнително, Судот укажува дека коефициентите за утврдување на судиските плати биле намалувани двапати во текот на 2024 година, а потоа повторно и во 2026 година, што според него создава континуирана тенденција на намалување на реалните примања на судиите.
Таквата практика, се наведува, директно ја загрозува материјалната положба на судиите и отвора ризик за нарушување на нивната независност и самостојност, што е клучен предуслов за функционирање на правната држава.
