Уставниот суд на Босна и Херцеговина го одби барањето за поништување на одредбите од Кривичниот законик врз основа на кои лидерот на Република Српска, Милорад Додик, минатата година беше правосилно осуден на една година затвор и шестгодишна забрана за извршување јавни функции поради непочитување на одлуките на високиот меѓународен претставник.
Иницијативата ја поднесоа 32 пратеници од Народното собрание на Република Српска, кои побараа Уставниот суд да оцени дали уставни се измените на Кривичниот законик што во 2023 година ги наметна високиот претставник Кристијан Шмит. Според нив, спорни биле одредбите со кои како кривично дело се третира непочитувањето на одлуките на високиот претставник.
Уставниот суд оцени дека овие одредби се во согласност со Уставот на БиХ и со Европската конвенција за човекови права. Во образложението се наведува дека законските решенија се доволно јасни, достапни и предвидливи, а нивната цел е заштита на владеењето на правото и на правниот поредок на Босна и Херцеговина.
Минатата година Судот на БиХ правосилно го осуди Додик на една година затвор и му изрече шестгодишна забрана за вршење функции во органите на власта поради непочитување на одлуките на Шмит.
По најновата одлука на Уставниот суд, Додик изјави дека станува збор за „политички монтирана инквизиција“ и повтори дека одлуките на високиот претставник ги смета за незаконски.
Во меѓувреме, властите на Република Српска бараат од американската администрација, покрај заминувањето на Кристијан Шмит од функцијата, да бидат поништени и одлуките што тој ги донел. Од друга страна, Советот за спроведување на мирот претходно порача дека нема да бидат ставени надвор од сила одлуките на високите меѓународни претставници во Босна и Херцеговина.
