Уставниот суд соопшти дека првпат го применил новиот механизам за извршување на своите одлуки, откако до Јавното обвинителство и Судскиот совет пријавил судија од Основниот граѓански суд Скопје поради неизвршување на одлука на Судот.
Како што информираат од Уставниот суд, на 24 јули 2026 година биле известени двете институции дека судијата, кој постапувал во предметот на новинарката Наташа Стојановска, не ја извршил Одлуката БЗСП. бр. 8/2025.
Уставниот суд на 24 септември 2025 година утврдил повреда на правото на слобода на јавно изразување на мислата на Стојановска, оценувајќи дека тоа право било повредено со пресуди на Основниот граѓански суд Скопје и Апелациониот суд Скопје.
По донесувањето на одлуката, адвокатот на Стојановска, Филип Медарски, го известил Судот дека таа не е извршена, бидејќи Основниот граѓански суд го отфрлил предлогот за повторување на постапката.
По разгледувањето на случајот, Уставниот суд донел решение со кое констатирал дека неговата одлука не била извршена. Според Судот, првостепениот суд се повикал на Законот за парничната постапка, но не ги земал предвид уставните карактеристики на одлуките на Уставниот суд, кои се конечни, извршни и општо задолжителни.
Од Уставниот суд посочуваат дека Основниот граѓански суд во претходни случаи веќе воспоставил практика да ги зема предвид одлуките на Уставниот суд како основ за повторување на постапката, поради што оцениле дека во предметот на Стојановска не било овозможено ефективно остварување на нејзините уставно загарантирани права.
Во соопштението се наведува и дека неизвршувањето на одлуките на Уставниот суд е заштитено и со кривично-правни санкции, а оценката дали постои кривична одговорност е во надлежност на Јавното обвинителство и судовите.
Предметот се однесува на новинарката Наташа Стојановска, која известувала за настаните во Собранието на 27 април 2017 година, кога, според Уставниот суд, била изложена на закани и заплашување и била спречена да ја извршува својата новинарска задача, без да ѝ биде обезбедена соодветна заштита од надлежните државни органи.
