Уставниот судија Гоце Наумовски поднел оставка од функцијата, но за неговата одлука Уставниот суд не бил официјално известен. Наместо тоа, информацијата била потврдена преку телефонски разговор меѓу претседателот на Уставниот суд, Дарко Костадиновски, и претседателот на Собранието, Африм Гаши.
Од Уставниот суд соопштија дека Наумовски не присуствувал на денешната седница, иако претходно најавил дека ќе дојде. Во текот на денот претседателот Костадиновски и неговите колеги безуспешно се обидувале да стапат во контакт со него, но не успеале да добијат одговор.
„До Уставниот суд не е доставено официјално известување од судијата Гоце Наумовски дека поднесува оставка. Ниту од Собранието досега не е пристигната официјална потврда. Единствената информација претседателот на Судот ја доби во телефонски разговор со претседателот на Собранието, кој потврди дека судијата поднел оставка“, наведуваат од Уставниот суд.
Причините за неговото повлекување засега не се познати.
Со заминувањето на Наумовски, Уставниот суд ќе продолжи да работи со седум судии. Претходно оставка од функцијата поднесе и уставната судијка Јадранка Дабовиќ.
Гоце Наумовски беше избран за уставен судија во февруари 2026 година, а неговиот избор предизвика реакции во јавноста бидејќи претходно беше советник на премиерот Христијан Мицкоски.
