Од СДСМ преку соопштение денеска порачаа дека остануваат уште 12 дена до рокот што, според нив, самиот Христијан Мицкоски го поставил за исполнување на реформите и европските обврски на државата.
Од партијата оценуваат дека без уставни измени и внесување на малцинствата во Уставот нема да има продолжување на евроинтегративниот процес и отворање на следната фаза од преговорите со Европската Унија.
„Без измени на Уставот и внесување на малцинствата, нема продолжување на ЕУ интеграциите, нема помрднување од мртва точка“, наведуваат од СДСМ.
Во реакцијата се посочува дека Мицкоски претходно тврдeл дека има апсолутно мнозинство и дека ја укинал техничката влада без консензус.
Од СДСМ велат дека нема да бидат алиби за, како што тврдат, неисполнување на реформите.
„Нека ги заврши реформите што ги вети, нека ги исполни обврските до 1 јуни“, порачуваат од партијата.
Во соопштението се наведува и дека Владата треба да покаже дали навистина сака продолжување на европскиот пат на државата.
„Или конечно нека им признае на граѓаните дека не сака ЕУ затоа што се плаши од европски стандарди, од реформи, од независно правосудство и од одговорност“, наведуваат од СДСМ.
