СДСМ преку соопштение обвини дека остануваат уште само 20 дена до рокот кој, според партијата, ќе го потврди неисполнувањето на реформската агенда од страна на премиерот Христијан Мицкоски и владата предводена од ВМРО-ДПМНЕ.
Од СДСМ тврдат дека Владата не спроведува суштински реформи и дека Мицкоски повторно се обидува да го дефокусира вниманието на јавноста преку создавање политички тензии и обвинувања кон опозицијата.
„Прво намерно заострување на односите со Бугарија, создавање тензии и конфликти, наместо градење позиции за напредок на државата. Второ напад кон СДСМ и лажно обвинување дека некој друг е виновен за тоа што Владата не спроведува реформи“, се наведува во партиското соопштение.
Од опозициската партија посочуваат дека Мицкоски сам признал дека за реформите не му е потребна опозицијата, имајќи предвид дека владејачкото мнозинство располага со доволен број пратеници во Собранието.
„Како што без консензус ја укина техничката влада, така може сам да ги донесе и сите останати закони и реформи“, наведуваат од СДСМ.
Партијата оценува дека власта ја користи СДСМ како алиби за неисполнетите ветувања и застојот во европските интеграции.
Во реакцијата повторно се отвора и прашањето за ставовите на Мицкоски околу Преспански договор, при што СДСМ обвинува дека премиерот ги довел во заблуда граѓаните со ветувања дека ќе го поништи договорот и ќе го врати старото уставно име на државата.
„Мицкоски не сака Европска Унија. Не сака европски правила, не сака европско обвинителство и европска контрола, затоа што тогаш нема да може да функционира системот на криминал, тендери и злоупотреби“, се наведува во соопштението.
Од СДСМ порачаа дека „времето на лагите изминува“ и дека граѓаните сè повеќе ја препознаваат, како што велат, вистинската политика на актуелната власт.
