Уште 300 приватни специјализанти ќе добијат работа во државното здравство

Владата, на предлог на министерот за здравство Сашо Клековски, донесе одлука со која до крајот на 2026 година ќе се овозможи вработување на уште 300 приватни специјализанти во јавните здравствени установи.

— реклама —

Од Министерството за здравство соопштија дека со оваа мерка се вложува во младите лекари и се создаваат услови тие својата професионална кариера да ја продолжат во домашниот здравствен систем.

— реклама —

Со новите вработувања се очекува да се намали недостигот од специјалистички кадар, да се зајакнат клиниките, болниците, здравствените домови и центрите за јавно здравје, како и да се обезбеди порамномерна распределба на медицинскиот персонал низ државата. Според Министерството, ова треба да придонесе и за пократко време на чекање и поквалитетни здравствени услуги за пациентите.

„Ова не е само одлука за 300 нови вработувања. Ова е инвестиција во 300 професионални иднини, во посилни здравствени установи и во подобра грижа за пациентите. Не ги школуваме нашите лекари за да ги изгубиме – инвестираме во нивното знаење за да го изградиме здравствениот систем што граѓаните го заслужуваат“, изјави министерот Клековски.

— реклама —

Вработувањата ќе се реализираат според потребите на јавните здравствени установи и недостигот од специјалистички кадар, со цел лекарите да бидат ангажирани таму каде што се најпотребни.

Од Министерството истакнуваат дека со оваа одлука испраќаат порака дека младите лекари се клучен дел од иднината на јавното здравство и дека нивниот професионален развој ќе продолжи да биде поддржан.