„Уште една недела - Владата не е способна ни за вода“, велат од СДСМ

СДСМ преку соопштение обвини дека Владата не успева да го реши проблемот со водоснабдувањето во Гостивар, посочувајќи дека водата сè уште не смее да се користи за пиење и подготовка на храна поради присуството на бактеријата Pseudomonas aeruginosa.

— реклама —

Од партијата велат дека надлежните повторно најавуваат стабилизација на состојбата „следната недела“, оценувајќи дека граѓаните повторно остануваат без конкретно решение.

СДСМ тврди дека сè уште не постои официјален документ со кој се потврдува дека водата е технички исправна за капење, ниту, како што наведуваат, некој презел одговорност за, според нив, труењето на граѓаните.

— реклама —

Во соопштението се осврнуваат и на појавата на жолтица во Гостивар, прашувајќи кој официјално потврдил дека епидемијата е завршена и врз основа на кои стручни проценки.

— реклама —

Од СДСМ наведуваат дека единствената причина поради која граѓаните повторно почнале да ја користат водата за капење била изјавата на премиерот Христијан Мицкоски дека таа ќе биде технички исправна, додавајќи дека тоа, според нив, не било потврдено со стручен документ.

Партијата оценува дека, доколку и понатаму се спроведува хиперхлорирање поради присуството на опасна бактерија, тогаш водата не е безбедна ниту за капење. Воедно, го критикуваат и министерот за здравство Сашо Клековски, тврдејќи дека не се огласува за состојбата.

— реклама —

„Оваа Влада не е способна ниту вода да обезбеди, а сака да води држава“, се наведува во партиското соопштение.