Велика Британија ќе им го оневозможи пристапот до социјалните мрежи на лицата помлади од 16 години, во потег што владата го опишува како пресвртница во заштитата на децата во дигиталниот простор и поставување нов стандард за идните генерации.
Според британската влада, новите мерки имаат цел да поттикнат културна промена и да ја унапредат политиката насочена кон обезбедување подобри услови за раст и развој на децата.
Предвидено е одредени ограничувања автоматски да важат и за младите на возраст од 16 и 17 години, со цел да се избегне наглата промена веднаш по наполнувањето на 16 години.
Владата најави дека дополнително ќе ја разгледа можноста за воведување ноќни ограничувања за користење на социјалните мрежи, како и прекинување на бесконечното „скролање“ за корисниците помлади од 18 години. Повеќе детали за овие мерки се очекува да бидат објавени во јули.
Британскиот премиер Кир Стармер изјави дека родителите се сè позагрижени за безбедноста и благосостојбата на своите деца во онлајн-средината, која, според него, го прави растењето потешко од кога било досега.
„Разговарав со многу семејства кои бараат промени и нашата влада ќе одговори со конкретни мерки. Одиме подалеку од која било друга земја во светот – ги забрануваме социјалните мрежи за помладите од 16 години и воведуваме поширока заштита за да им го вратиме детството на децата“, порача Стармер.
Тој оцени дека станува збор за пресвртна точка во политиките за заштита на децата на интернет, додавајќи дека технолошките компании имале можност самите да воспостават ефикасни механизми за заштита, но не успеале во тоа.
„Сега државата ја презема одговорноста да ги заштити децата, да ги поддржи родителите и да постави нов стандард за идните генерации“, истакна британскиот премиер.
