Вештачката интелигенција го менува пазарот на трудот: Дали ни се закануваат масовни откази? Извршниот директор на „ОпенАИ“, Сем Алтман, изјави дека вештачката интелигенција досега не предизвикала очекуван бран на укинување канцелариски работни места, особено на почетните позиции.
Говорејќи на конференција во Сиднеј, Алтман призна дека претходно имал поинакви очекувања за брзината и интензитетот на влијанието на вештачката интелигенција врз пазарот на трудот, пренесува „Ројтерс“.
Тој оцени дека погрешно ги проценил краткорочните општествени и економски ефекти од развојот на оваа технологија.
Според Алтман, вештачката интелигенција сè повеќе презема одредени деловни задачи, како одговарање на пораки и електронска пошта, но во многу професии и натаму постои „човечки фактор“ што не може лесно да биде заменет.
„Токму тој фактор е главната причина поради која не очекувам сценарио со нагло и масовно исчезнување на работните места“, изјави Алтман.
Неговите коментари доаѓаат во период кога сè повеќе компании во светот воведуваат AI-алатки во деловните процеси, паралелно со одредени кратења на работни места, но без јасен тренд што би укажувал на систематска замена на човечката работна сила со вештачка интелигенција.
