Германската влада подготвува обемен пакет мерки за сузбивање на даночната измама, перењето пари и финансискиот криминал, со цел да ги зголеми буџетските приходи во период кога државата се соочува со рекордни расходи и ново задолжување.
Министерката за правда Стефани Хубиг и министерот за финансии Ларс Клингбајл претставија акциски план со 26 мерки, кој предвидува формирање на Заеднички центар за борба против даночниот и финансискиот криминал во рамките на царинската управа.
Според планот, ќе бидат отворени 1.500 нови работни места за истраги, анализи и кривично гонење, а во откривањето на сложени случаи ќе се користи и вештачка интелигенција.
„Никој не треба да смета дека нема да биде откриен. Даночните измамници, кои со криминални трикови ги полнат своите џебови, не смеат да останат неказнети“, изјави Клингбајл.
Мерките предвидуваат и построги казни. Максималната затворска казна за организирана даночна измама ќе се зголеми од 10 на 15 години, а најтешките случаи ќе бидат преквалификувани во потешки кривични дела, со минимална казна од една година затвор.
Владата планира да ги прошири и овластувањата за привремено одземање имот за кој постои сомневање дека е стекнат незаконски. Царинските служби ќе можат да го задржат таквиот имот до 180 дена, а сопствениците ќе треба да докажат дека е стекнат на законски начин.
Посебно внимание ќе биде насочено и кон трансакциите со криптовалути. Владата најавува нови правила за нивното оданочување, како и воведување анализа на блокчејн-трансакции за полесно откривање на финансиски криминал.
Од 2028 година, сите компании со годишен промет над 100.000 евра ќе мора да користат регистрирани фискални каси, што ќе опфати и дејности во кои досега често се работело со готовина, како што се трговците со накит и антиквитети.
Министерството за финансии веќе пресметува дека само во 2027 година овие мерки ќе донесат дополнителни приходи од најмалку една милијарда евра, иако германските власти очекуваат конечниот ефект да биде значително поголем.
Планот доби поддршка од невладината организација „Финанцвенде“ и од опозициските Зелени, кои оценија дека станува збор за важен чекор во борбата против даночниот криминал.
