Научници со помош на вештачка интелигенција открија 73 досега непознати вулкански калдери на дното на океанот, откритие што може значително да придонесе за подобро предвидување на идните вулкански опасности.
Истражувањето го предводел тимот на вулканологот Андреа Веролино од Универзитетот „Пари-Сакле“ во Франција, а резултатите покажуваат дека бројот на познати подморски калдери е повеќе од тројно зголемен.
Поголемиот дел од вулканската активност на Земјата се одвива под океаните, каде што тектонските плочи постојано се движат и се судираат. Иако повеќето подморски ерупции се со помал интензитет, некои можат да предизвикаат силни експлозии, цунами, ударни бранови и огромни количества водена пареа.
Како предупредување, научниците ја посочуваат ерупцијата на подморскиот вулкан Хунга Тонга-Хунга Хаапаи во 2022 година, која создаде атмосферски ударни бранови што стигнаа до целата вселена и предизвикаа цунами и штети на илјадници километри оддалеченост.
За да ги пронајдат новите калдери, истражувачите употребиле алгоритам со вештачка интелигенција, првично развиен за откривање ударни кратери на Марс. Алгоритмот бил применет врз батиметриски карти што ја прикажуваат релјефната структура на морското дно.
Во почетната анализа биле издвоени повеќе од 87.000 можни формации. По дополнителни проверки и рачна анализа, научниците идентификувале 78 веројатни калдери, од кои пет веќе биле познати, а 73 се новооткриени.
Повеќето од новооткриените калдери се наоѓаат во внатрешноста на тектонските плочи, додека дел се откриени долж средноокеанските гребени и во вулканските лакови.
Научниците нагласуваат дека сè уште не е утврдено дали овие калдери се активни, но потсетуваат дека и вулкани што долго време се сметале за неактивни можат повторно да се исполнат со магма и да еруптираат. Затоа, според нив, ваквите откритија се важна основа за идните глобални проценки на вулканските ризици.
