Полициски службеници од ОВР Кавадарци, во соработка со СВР Куманово, уапсиле 32-годишен жител на Кавадарци, осомничен дека измамил 50-годишна жена од Куманово за вкупно 9.000 евра, лажно ветувајќи ѝ дека ќе посредува за добивање странски пасош.
Како што соопшти Министерството за внатрешни работи, осомничениот првично побарал 400 евра за наводното посредување, но потоа во повеќе наврати барал дополнителни парични средства. Според пријавата, оштетената за краток период му предала вкупно 9.000 евра, а тој продолжил да бара уште пари.
По претходно преземени мерки, на 23 јули на Градскиот плоштад во Кавадарци полициските службеници го лишиле од слобода. При претрес кај него биле пронајдени 2.000 евра што непосредно претходно ги зел од оштетената, а парите биле претходно криминалистичко-технички обработени од полицијата.
Осомничениот бил задржан во полициска станица, а потоа изведен пред јавен обвинител, каде, според МВР, го признал делото.
По целосното документирање на случајот, против него ќе биде поднесена кривична пријава за кривичното дело „измама“ согласно член 247 став 1 од Кривичниот законик.
