(Видео) Американската војска објави снимка од напад со поморски дронови врз Иран

Американската војска објави снимка од нападот со поморски беспилотни летала врз објект за одржување подморници и воени бродови во иранската поморска база Бандар Абас.

Американската Централна команда (CENTCOM) соопшти дека нападот бил изведен во неделата со три беспилотни површински пловила од типот „Корсар“ и дека ова е првпат американската војска да употреби ваков вид поморски дронови во борбена операција.

— реклама —

Според CENTCOM, станува збор за беспилотни пловила што биле користени како еднократни ударни дронови. На објавената снимка се гледа како пловилата со голема брзина се приближуваат кон пристаништето, по што следуваат експлозии.

Американската команда соопшти дека нападите ја намалиле способноста на Иран да изведува напади врз трговски бродови, но не објави информации за евентуални жртви или за обемот на предизвиканата штета.

— реклама —

— реклама —

Нападот бил дел од поширока американска воена операција насочена кон десетици цели во Иран. Според CENTCOM, биле погодени системи за противвоздушна одбрана, крајбрежни радари, ракетни и беспилотни капацитети, како и помали воени пловила.

Во операцијата, покрај поморските дронови, биле употребени борбени авиони, воени бродови и воздушни беспилотни летала. Американската војска наведува дека целта била да се намали способноста на Иран да ја загрозува меѓународната пловидба низ Ормускиот Теснец.

Новите американски напади следуваа откако во Ормускиот Теснец беше погоден контејнерскиот брод „ГФС Галакси“, кој пловел под кипарско знаме. Вашингтон ја обвини Иранската револуционерна гарда за нападот.

Иран, пак, соопшти дека бродот бил нападнат затоа што не ги почитувал предупредувањата и пловел по рута што Техеран ја прогласил за недозволена, додека кипарските власти наведоа дека бродот бил погоден од засега неидентификуван проектил.