Состојбата со пожарите на отворен простор во земјава и натаму е алармантна, а пожарникарите и другите надлежни служби во текот на вчерашниот ден се соочиле со повеќе од 41 пожар, информира директорот на Дирекцијата за заштита и спасување, Стојанче Ангелов.
Според него, слабите врнежи што паднале во делови од државата само делумно ја олесниле работата на екипите на терен.
Пожарот што пред неколку дена избувна на територијата на Штип, меѓу селата Селце и Пухче, вчера попладне излегол од контрола и нагло се проширил поради силниот ветер. Ангелов веднаш заминал на терен и наредил ангажирање дополнителни сили. Пожарникарите со големи напори успеале да го стават огнот под контрола во вечерните часови, а екипите продолжиле да работат долж огнената линија и во текот на ноќта.
Утрово пожарот е целосно под контрола, но на одредени места повторно се појавуваат жаришта. На терен се штипските пожарникари, со поддршка од огнените тимови на Дирекцијата за заштита и спасување, кои ги гаснат новите жаришта.
Ангелов предупреди дека екипите ќе останат на терен во текот на целиот ден, бидејќи со порастот на температурите и засилувањето на ветерот во попладневните часови може повторно да се појават проблеми.
Пожарот на Пелистер е ставен под целосна контрола, но и таму на одредени места има чадење и повторно појавување на жаришта. Пожарникарите од Битола интервенираат на секоја нова појава на оган, најчесто во веќе изгорените делови или долж огнената линија.
Во текот на ноќта, од косовска страна кон Македонија се проширил голем пожар кој во моментов се движи во правец на селото Грачани. Огнената линија е долга повеќе од пет километри. На терен се скопски пожарникари, со поддршка од тимовите на Дирекцијата за заштита и спасување, кои се обидуваат да воспостават делумна контрола и да спречат загрозување на околните села. Ангелов вели дека во овој момент не очекува директно загрозување на населените места, но мирисот од пожарот може да се почувствува и во делови од Скопје.
Нови огнени точки повторно се појавиле и на планината Китка, од скопската страна, но на територијата на Општина Студеничани. Пожари има во реонот на селата Количани и Цветово. На нив интервенираат скопските пожарникари, а се очекува дел од пожарите наскоро да бидат ставени под контрола. Сепак, на една од локациите теренот е особено непристапен, поради што интервенцијата може да трае подолго.
Како еден од најтешките активни пожари во моментов, Ангелов го издвојува пожарот на границата меѓу Општина Струга и Општина Дебар, во реонот на селата Луково и Буринец. Поради опасноста огнот да се приближи до населените места, рано утрово како поддршка е испратен армиски хеликоптер со голема корпа, кој интервенира во текот на утрото.
На терен се и припадници на Национални шуми, распоредени долж пожарната линија. Ангелов изрази надеж дека пожарникарите од Струга ќе успеат да воспостават контрола најмалку од страната на селата и да спречат нивно загрозување.
Останатите активни пожари во земјава, според Ангелов, се релативно помали и во моментов не претставуваат опасност за околните населени места. За нив Центарот за управување со кризи ќе објави дополнителни информации.
