Речиси 3.000 хектари природен парк во источна Белгија се зафатени од голем шумски пожар, кој властите го опишуваат како еден од најголемите во поновата историја на земјата. Поради брзото ширење на огнот, стотици жители од околните населени места беа евакуирани.
Пожарот избувна во петокот во природниот парк Хај Фенс, во близина на границата со Германија, а силниот ветер во текот на ноќта неколкупати го менувал правецот, дополнително отежнувајќи го гаснењето.
„Условите и натаму се сложени. Иако интензитетот на пожарот е слаб, ветерот во текот на ноќта неколкупати го промени правецот“, соопштија валонските власти.
Околу 600 жители од селата Сурброд и Бутгенбах добиле наредба превентивно да ги напуштат домовите. За евакуираните било отворено засолниште во гимназија во соседната општина Малмеди, додека на останатите жители им било препорачано да останат во затворени простории и да ги држат прозорците и вратите затворени.
Големи делови од природниот резерват се претворени во опожарено подрачје, а пристапот до огнот е исклучително тежок поради мочурливиот и нерамен терен, составен од тресетишта, вресишта и дрвени патеки.
„Повеќе ништо не се гледа, насекаде има чад“, изјавил за АФП сопственик на ресторан во близина. Тој раскажал дека пепел паѓал врз масите, по што гостите морале да го напуштат објектот.
Властите предупредија дека пожарот сè уште не е ставен под контрола и постои опасност пламенот да стигне до куќите. Во гаснењето се ангажирани екипи од цела Белгија, а земјата го активираше и механизмот за цивилна заштита на Европската Унија.
Од Холандија веќе пристигнал хеликоптер, а на пат се уште два, како и два шведски авиони за гаснење пожари. Белгиските власти оценуваат дека воздушната поддршка ќе биде од особена важност поради тешко пристапниот терен.
Пожарот избувнал во период на нов топлотен бран, при што температурите во делови од Белгија во петокот достигнале 37 степени Целзиусови. Властите го опишуваат пожарот како еден од најголемите во модерната историја на земјата.
Во близина, само неколку десетици километри подалеку, во западна Германија, истовремено беснее уште еден голем шумски пожар, поради кој околу 1.800 луѓе веќе се евакуирани.
