Бројот на лица кои се водат како исчезнати во Непал по катастрофалните поројни поплави се зголеми на 826, соопштија непалските власти. Со најновите податоци, бројот на исчезнати во Непал и кинески Тибет надмина 1.300.
Поплавите ги погодија пограничните подрачја на Непал и Тибет, при што беа предизвикани големи разурнувања и прекини во инфраструктурата. Претходно беше соопштено дека најмалку 157 лица загинале, додека стотици други се водат како исчезнати.
Во Непал беа однесени куќи, патишта, мостови и објекти од енергетската инфраструктура. Особено тешко е погодена областа Расува, каде што спасувачките екипи се соочуваат со исклучително тешки услови.
Претходните податоци покажуваа дека меѓу исчезнатите има голем број странски државјани. Непалските власти предупредија на опасност од дополнително влошување на состојбата и ги повикаа жителите во повеќе области да се оддалечат од реките Боте Коши, Тришули и Нарајани.
Катастрофата ја предизвикал огромен налет на вода, кал и остатоци што се излеале од коритото на река во пограничниот планински регион. Точната причина за ненадејниот бран сè уште се утврдува, но се разгледува можноста земјотресот со магнитуда од 4,4 степени, регистриран во близина на границата со Тибет, да предизвикал отцепување на големо парче мраз од глечер.
Се стравува дека состојбата може дополнително да се влоши бидејќи делови од речните текови и натаму се блокирани со мраз, карпи и наноси. Предупредувања поради можни поплави се издадени и во индиските сојузни држави Бихар и Утар Прадеш, низводно од погодените реки.
Во спасувачките операции се вклучени припадници на полицијата и армијата. Во одделни планински подрачја хеликоптерите не можат да слетаат поради високото ниво на водата, а работата дополнително ја отежнуваат обилните монсунски дождови.
Сериозно е нарушено и снабдувањето со електрична енергија, главно поради оштетувањето и уништувањето на хидроцентрали.
И во кинески Тибет се спроведува голема операција за пребарување и спасување. Кинескиот претседател Си Џинпинг побара максимални напори за пронаоѓање на исчезнатите и засилување на системите за следење и рано предупредување.
Хималајскиот регион, кој ги опфаќа Непал, Индија, Кина и Бутан, е особено подложен на поплави и свлечишта. Научните истражувања укажуваат дека регионот се загрева побрзо од глобалниот просек, додека топењето на глечерите се забрзува.
