(Видео) „Денеска да избереме нова власт“ – носителот на студентската листа гласаше во Нови Сад

Носителот на студентската изборна листа „Студентите победуваат“, Илија Срдановиќ, денеска гласаше во Нови Сад, од каде што изрази надеж дека изборниот ден ќе помине мирно и во демократска атмосфера, а Србија ќе добие нова власт.

„Се надевам дека денешниот ден ќе помине во демократска атмосфера и мир и дека легитимно ќе избереме нова власт во Србија“, изјави Срдановиќ по гласањето.

— реклама —

Тој пристигнал со своето семејство на избирачкото место во Основното училиште „Прва војвоѓанска бригада“ во Нови Сад, каде што чекал во ред заедно со останатите граѓани.

— реклама —

Коментирајќи ги големите редици и зголемениот интерес за гласање, Срдановиќ оцени дека ваквата излезност била очекувана уште во текот на предизборната кампања.

Според него, досегашните показатели упатуваат на можноста Србија да забележи рекордна излезност на парламентарни избори во поновата историја.

На новинарско прашање за заштитата на изборната волја, Срдановиќ порача дека изборниот резултат треба да биде најсилната потврда за одлуката на граѓаните.

— реклама —

„Тоа е најлегитимниот можен начин на кој можеме да добиеме нова власт што ќе ја води Србија кон подобра иднина“, изјави тој.

Прашан дали граѓаните треба да останат во близина на избирачките места по завршувањето на гласањето, Срдановиќ најави дека студентската листа вечерва ќе ги претстави своите прелиминарни резултати и ќе даде насоки за понатамошните активности.

„Вечерва, кога ќе ги претставиме прелиминарните резултати, ќе дадеме и насоки што да се прави понатаму. Најважно е луѓето слободно да излезат и да гласаат според својата совест“, порача Срдановиќ.

Предвремените парламентарни избори во Србија се одржуваат во услови на политичка поларизација, по студентските протести што започнаа по трагедијата на железничката станица во Нови Сад. Студентското движење, кое произлезе од протестите, на овие избори настапува како политички предизвикувач на владејачкиот блок на Александар Вучиќ.