(Видео) Драматични сцени во Хрватска: Огнот стигна до куќите, 300 хектари изгореа, четворица се борат за живот

Пожарникарите во Хрватска и натаму се борат со последиците од големите пожари што зафатија повеќе подрачја, а драматично било и на островот Дуги Оток, каде што огнот уништил околу 300 хектари ниска вегетација, грмушки и шума.

Пожарот кај местото Брбињ избувнал синоќа околу 20 часот, а гаснењето било особено отежнато поради непристапниот и стрмен терен, густата вегетација и близината на куќи во островските заливи.

Пожарот бил локализиран утрово околу 8 часот. Иако нема пријавена материјална штета на објектите, пожарникарите цела ноќ биле ангажирани во нивна одбрана. Во гаснењето учествувале копнени екипи, а како поддршка биле испратени и два канадери.

— реклама —

Главниот противпожарен командант Славко Туцаковиќ потврдил дека со заеднички ангажман на копнените и воздушните сили биле одбранети сите куќи. Пожарникарите остануваат на теренот за да спречат повторно разгорување.

— реклама —

Во меѓувреме, пожарот кај Омиш е ставен под контрола, но на големата пожарна линија повремено повторно се појавуваат чад и пламен. Екипите реагираат на секое ново жариште, а на тешко пристапниот терен зад планината Омишка Динара интервенираат и воздушните сили.

Причината за пожарот кај Омиш сè уште се истражува. Земени се примероци и се анализираат снимки, додека дел од локалното население се сомнева дека огнот бил подметнат. Засега, сепак, нема официјална потврда за причината.

— реклама —

Граѓаните и туристите кои беа евакуирани од загрозените подрачја биле згрижени во Омиш, Сплит и Дуги Рат. За нив биле обезбедени храна, пијалаци и сместување, а дел од луѓето биле префрлени во хотели.

Последиците од пожарот се чувствуваат и во здравствениот систем. Четири тешко повредени лица се пренесени од Сплит во клиники во Загреб. Според лекарите, станува збор за две лица од машки и едно од женски пол, на возраст од 18 до 46 години, со тешки изгореници кои зафаќаат од 40 до 50, па и до 70 проценти од телото. Лекарите се борат за нивните животи.

Во пожарот кај Омиш е регистрирана и првата жртва. Вчера во опожареното подрачје било пронајдено безживотно тело. Хрватските медиуми неофицијално објавија дека можно е да станува збор за 34-годишна државјанка на Босна и Херцеговина, но надлежните сè уште немаат официјално потврдено ниту го објавиле идентитетот на починатата.