Серија земјотреси во неделата напладне го погодија грчкиот остров Евија, североисточно од Атина, при што се оштетени повеќе куќи и делови од патната инфраструктура. Според локалните власти, нема информации за повредени лица.
Потресите силно се почувствувале и во Атина и во околните подрачја, предизвикувајќи вознемиреност кај населението.
Градоначалникот на општината Мантуди-Агија Ана, Јоргос Цапурниотис, изјави дека се регистрирани оштетувања на бројни куќи во Прокопи, на северот од Евија, како и во Дафнуса во централниот дел на островот. Дополнително, поради свлечишта биле оштетени и делови од патната мрежа.
Првиот земјотрес бил регистриран во 12:58 часот и имал јачина од 4,8 степени според Рихтеровата скала, соопшти Геодинамичкиот институт на Грција. Потресот бил плиток, на длабочина од околу пет километри.
Само неколку минути подоцна следувал втор, посилен земјотрес со јачина од 5,2 степени според Рихтеровата скала. Епицентарот бил лоциран на околу два километри источно-југоисточно од Прокопи, исто така на длабочина од приближно пет километри.
Надлежните служби продолжуваат со проценка на штетите и следење на сеизмичката активност во регионот.
