(Видео) Еден загинат и над 120 повредени во голем пожар во руски гасно-хемиски комплекс

Пожар избувнал во огромен гасно-хемиски комплекс на рускиот Далечен Исток, при што загинал еден кинески работник, а повеќе од 120 лица биле повредени. Информацијата ја потврди компанијата која управува со објектот.

Комплексот „Амур“ (AGCC), лоциран во близина на градот Свободни во Амурската област, е заеднички проект на рускиот петрохемиски гигант „Сибур“ и кинеската државна компанија „Синохем“, вреден околу 10 милијарди долари. Објектот е проектиран да биде еден од најголемите светски капацитети за производство на полимери, а во моментот на несреќата во него се вршеле завршни тестирања. Почетокот на производството бил планиран за 2027 година.

— реклама —

Според официјалните информации, пожарот избувнал во помошен дел од единицата за пиролиза, при што главната опрема не била оштетена.

Деветнаесет работници се хоспитализирани поради повреди со средна и тешка сериозност, додека на уште 104 лица им била укажана медицинска помош поради полесни повреди, меѓу кои исеченици и модринки.

— реклама —

Компанијата потврдила и дека еден од повредените работници, кинески државјанин ангажиран преку кооперант, починал и покрај укажаната медицинска помош.

— реклама —

Гаснењето на пожарот продолжува, а итните служби спроведуваат контролирано согорување на преостанатите гасови во објектот. Надлежните служби соопштија дека мерењата на квалитетот на воздухот во Свободни не покажале зголемени концентрации на токсични материи.

Владата на Амурската област соопшти дека инцидентот во моментов не претставува опасност за жителите на околните населени места.

Формирана е комисија која треба да ги утврди причините за избувнувањето на пожарот.