Најмалку едно лице загина, девет се повредени, а уште девет се водат како исчезнати по тежок инцидент во фабрика за производство на хартија и пакување во Вашингтон, откако пукнал резервоар со хемикалии што се користеле во производствениот процес.
Инцидентот се случил во фабриката Нипон Дајнавејв Пекинг Ко. во градот Лонгвју, а според локалните противпожарни служби, првично било пријавено дека станува збор за експлозија на резервоар.
Шефот на противпожарната служба во Лонгвју, Скот Голдштајн, изјавил дека спасувачките екипи и натаму се на терен и дека операцијата е исклучително сложена поради безбедносните ризици.
Според информациите, меѓу повредените има осум вработени и еден пожарникар. Дел од повредените се здобиле со тешки и животозагрозувачки повреди.
Фабриката е во сопственост на јапонската компанија Нипон Пејпер Индастрис, која произведува картонска амбалажа за течности.
Надлежните соопштија дека резервоарот содржел бела хемикалија за производство на хартија. Првично беше наведено дека капацитетот изнесувал околу 300.000 литри, но подоцна информациите беа ревидирани и беше објавено дека во резервоарот имало околу 3,4 милиони литри течност.
Властите засега не гледаат директна опасност за околната заедница, но им препорачаа на граѓаните да ја избегнуваат областа околу фабриката.
Гувернерот на државата Вашингтон, Боб Фергусон, изрази сочувство до жртвите и нивните семејства.
„Длабоко сум тажен што слушнав дека имало жртви. Моите мисли се со работниците и нивните семејства, како и со спасувачките служби“, напиша Фергусон.
