Американскиот Стејт департмент издаде ново предупредување до американските државјани кои живеат или престојуваат во Русија, посочувајќи ја зголемената опасност од напади со беспилотни летала врз руски градови.
Во соопштението се наведува дека напади и експлозии предизвикани од дронови се регистрирани не само во близина на украинската граница, туку и во големи руски градови како Москва, Казањ и Санкт Петербург.
„Во случај на итна ситуација, следете ги упатствата на локалните власти и побарајте засолниште“, наведува Стејт департментот.
Американските власти ги советуваат граѓаните веднаш да се оддалечат доколку забележат дрон или негови остатоци и да не ги допираат, фотографираат или снимаат. Дополнително, предупредуваат дека руското законодавство забранува објавување фотографии и видеа од последиците од нападите со беспилотни летала, а прекршувањето на тие правила може да резултира со парични казни или затворски санкции.
Вашингтон уште еднаш ги повика американските државјани да не патуваат во Русија, која и понатаму останува под највисокото ниво на американско предупредување за патување.
Предупредувањето доаѓа откако утрово Украина изврши масовен напад со беспилотни летала врз Москва, кој, според градоначалникот на руската престолнина, Сергеј Собјанин, е најголемиот во последните две години.
