Вооружен маж е убиен откако отворил оган во близина на безбедносен пункт на Белата куќа во Вашингтон, по што агентите на американската Тајна служба возвратиле со оган и го неутрализирале напаѓачот.
Пукањето се случило вчера вечерта, нешто по 18 часот по локално време. Според соопштението на Тајната служба, осомничениот извадил оружје од торба и почнал да пука, по што службениците реагирале и отвориле оган кон него.
Напаѓачот бил префрлен во болница, каде што подоцна им подлегнал на повредите.
Како осомничен е идентификуван 21-годишниот Насире Бест. Според судските документи, тој и претходно бил уапсен во јули 2025 година, кога без дозвола се обидел да влезе на друг пункт на Белата куќа. Тогаш не ги послушал наредбите на полицијата, тврдел дека е Исус Христос и рекол дека сака да биде уапсен.
По првото сослушување му била изречена забрана за приближување, а подоцна бил издаден и налог за приведување поради непочитување на мерките.
Во инцидентот е ранета и уште една личност која се нашла во близина, но засега не е утврдено дали е погодена од куршумите на напаѓачот или од огнот на агентите.
Од Тајната служба соопштија дека ниту еден нивен припадник не е повреден и дека американскиот претседател Доналд Трамп, кој во моментот се наоѓал во Белата куќа, не бил во опасност.
Директорот на ФБИ, Каш Пател, изјави дека агенти на федералната служба се на терен и дека јавноста ќе биде дополнително информирана штом има повеќе детали.
Американските медиуми наведуваат дека ова е трет вооружен инцидент во близина на Белата куќа во последниот месец.
