Нови видеоснимки што се шират на социјалните мрежи отворија сомнежи дека за време на масовниот напад со беспилотни летала врз Москва дошло до сериозен инцидент во кој, според неофицијални информации, ракета од руската противвоздушна одбрана погодила значаен нафтен објект.
Станува збор за рафинеријата „Капотња“, една од најважните енергетски постројки во Русија. По ударот следела силна експлозија, а на објавените снимки се гледа како капакот на еден од резервоарите е исфрлен високо во воздух.
Нападот бил изведен со голем број украински беспилотни летала, кои во текот на ноќта погодиле повеќе цели во Москва и нејзината околина. Според достапните снимки, во еден момент во кадарот влегува проектил кој го погодува веќе оштетениот резервоар, што дополнително ги поттикна шпекулациите дека можеби станува збор за грешка при дејствување на руската противвоздушна одбрана.
Засега нема официјална потврда од руските власти за причините за експлозијата, ниту за тврдењата што се појавија на социјалните мрежи.
Украинскиот претседател Володимир Зеленски изјави дека нападите претставуваат „оправдан одговор“ на претходните руски удари врз украински градови. Тој предупреди дека конфликтот би можел дополнително да ескалира, порачувајќи дека доколку Украина продолжи да гори, последиците ќе ги почувствува и Москва.
По нападите, безбедносните мерки во центарот на Москва се дополнително заострени. Црвениот плоштад е затворен, а на повеќе клучни локации се распоредени вооружени сили, вклучително и во близина на Мавзолејот на Ленин.
Во нападите бил погоден и големиот трговски центар „Садовод“, каде што избувнал пожар. Засега не се соопштени информации за евентуални жртви или за обемот на предизвиканата материјална штета.
