Зетот на командантот на руските Воздушно-космички сили, Александар Чајка, загинал во експлозијата што се случи на 1 август во ресторанот „Балзи Роси“ во центарот на Москва, објави рускиот портал „Агентство“.
Според порталот, смртта на Данил Передриј е потврдена откако еден од неговите лични документи бил прогласен за неважечки истиот ден, а информацијата е евидентирана и во рускиот регистар на правни лица.
Експлозијата се случила за време на приватен настан во ресторанот, а според проруски блогери, можно е прославата да била организирана по повод 55. роденден на Александар Чајка.
Рускиот Национален антитерористички комитет соопшти дека жена се обидела да внесе импровизирана експлозивна направа, маскирана како подарок, но била запрена од обезбедувањето. Во експлозијата загинале жената, припадник на обезбедувањето и уште еден гостин, додека повеќе од 20 лица биле повредени. Дел од руските медиуми објавија дека вкупниот број на загинати изнесува пет.
Неколку руски медиуми и канали на Телеграм претходно објавија дека можно е цел на нападот да била приватната прослава на роденденот на Чајка.
