Вулканот Анак Кракатау во Индонезија рано утрово еруптирал, при што облаци вулканска пепел се прошириле кон делови од Џакарта и околните области, а поради опасноста за воздушниот сообраќај привремено биле прекинати летовите од меѓународниот аеродром „Сукарно-Хата“.
Индонезиската геолошка агенција соопшти дека вулканот, кој се наоѓа во Сундскиот Теснец меѓу островите Јава и Суматра, покажувал зголемена активност уште од петокот. Ерупцијата започнала во 3:53 часот и траела околу 30 секунди.
Активноста продолжила со серија ерупции, при што од кратерот бил исфрлан врел материјал и била забележана „фонтана од лава“. Тутнежот и потресите биле почувствувани во повеќе подрачја на провинциите Бантен, Лампунг и Западна Јава.
Жителите на Џакарта и околните градови на социјалните мрежи објавија снимки и фотографии од вулканскиот пепел што паѓал на улиците. На снимките се гледаат ситни светли честички кои паѓаат од небото, додека автомобилите, зградите и јавните површини во делови од метрополата биле покриени со сивкаста прашина.
Засега нема информации за жртви, ниту е издадена наредба за евакуација. Надлежните, сепак, ги предупредиле жителите и посетителите да не се приближуваат на помалку од три километри од активниот кратер. Најблиското населено место се наоѓа на повеќе од 16 километри од вулканот.
Индонезискиот Центар за вулканологија и ублажување на геолошките опасности соопшти дека вулканскиот пепел се проширил и кон делови од Џакарта и провинцијата Лампунг.
Поради зголемената вулканска активност, меѓународниот аеродром „Сукарно-Хата“ привремено го прекинал воздушниот сообраќај од 5:30 до 9:30 часот.
Со помош на сателитски снимки биле идентификувани два облака вулкански пепел. Едниот достигнал височина од околу 6.100 метри и се движел кон североисток, при што влијаел врз делови од Џакарта, Бантен и Западна Јава.
Вториот облак се искачил до околу 15.200 метри и се движел кон запад и северозапад, покривајќи делови од Бантен, Лампунг и Бенгкулу, како и Сундскиот Теснец и дел од Индискиот Океан западно од Суматра.
Според истражувачите, вулканската активност можеби предизвикала подводно свлечиште и уривање на значителен дел од југозападната падина на Анак Кракатау, што довело и до поместување на големо количество вода.
