(Видео) Ескалација на протестите во Тирана: Демонстрантите фрлаа пиротехнички средства кон седиштето на Социјалистичката партија, полицијата употреби солзавец и гумени палки

Протестите во Тирана ескалираа во судири меѓу демонстрантите и полицијата, а инциденти беа регистрирани на повеќе локации низ албанската престолнина.

Демонстрантите фрлале петарди и пиротехнички средства кон седиштето на Социјалистичката партија, по што полицијата употребила солзавец и гумени куршуми за да ја растера толпата, пренесува „Албанјан пост“.

— реклама —

Тензично било и на плоштадот „Скендербег“, каде што полициски возила тргнале во потера по демонстрантите. За време на интервенциите, полицајците бркале повеќе лица низ улиците и употребувале гумени палки.

Во еден од инцидентите, полицајци фатиле демонстрант и го удирале со гумени палки. Приведени биле и неколку млади лица во центарот на Тирана и во близина на угостителски објекти.

Дополнителен инцидент се случил кај Националната опера и балет, на плоштадот „Скендербег“, кога полицијата се обидела да приведе малолетник. На интервенцијата се спротивставиле граѓанки, главно жени, кои барале младиот човек да не биде приведен. И при други приведувања дел од граѓаните протестирале поради постапувањето на полицијата.

— реклама —

Биле изнесени и обвинувања за физичко насилство и психолошки притисок врз младите, но околностите на овие настани сè уште не се целосно разјаснети, наведува порталот.

— реклама —

Демонстрантите користеле и симболични банкноти во вредност од 2.500 евра, исмевајќи го ветувањето на албанскиот премиер Еди Рама за парична награда за припадниците на државната полиција.

Во текот на вечерта, едно лице ја изгубило свеста во делот од градот познат како „Тајван“, каде што присутните граѓани и медицинскиот персонал му укажале прва помош.

Засилени безбедносни мерки биле преземени и во близина на филијала на банка, која била нападната во претходните денови. Таму биле поставени метални бариери и било ангажирано приватно обезбедување.

Протестите во Албанија се одржуваат веќе седми ден, а ги предводат студенти незадоволни од состојбите во образованието, високите трошоци за студирање и слабите можности за вработување на младите. Демонстрациите прераснаа во пошироки протести против владата на Еди Рама, со барања за негова оставка.