Претседателот на СДСМ, Венко Филипче, при посетата на Свети Николе и средбите со граѓани и земјоделци од Овчеполието, изјави дека високите трошоци за живот и земјоделското производство создаваат сериозни проблеми за населението.
Филипче посочи дека цената на горивото достигнала до 105 денари за литар и дека, според него, нема доволно помош за најзагрозените категории граѓани.
„Ги споделуваат граѓаните со нас секојдневните проблеми, огромни, натрупани, без никаква грижа и помош од власта. Трошоците за горивото стигнаа и до 105 денари за литар“, изјави Филипче.
Тој ги посочи пензионерите со најниски пензии, социјално загрозените, семејствата со многу деца и работниците со минимална плата како категории на кои, според него, им е потребна дополнителна поддршка.
Филипче ги спомена и предлог-законите на СДСМ за зголемување на минималната плата на 600 евра и за финансиска поддршка на земјоделците погодени од кризата, повикувајќи ја власта да ги разгледа предложените мерки.
На средбите со земјоделците од Овчеполието биле посочени проблеми со откупот на грозјето и пченицата, ниските откупни цени на млекото, како и високите трошоци за ѓубрива и нафта.
Филипче предупреди дека состојбата може да го доведе во прашање продолжувањето на земјоделското производство во следната година.
„На овие луѓе им е потребна сериозна помош“, порача Филипче, пренесувајќи го и предупредувањето на земјоделците дека, доколку состојбата продолжи, за две години во овој крај би можело да нема земјоделство.
