Претседателот на СДСМ, Венко Филипче, при посетата на Свети Николе се сретна со граѓани и земјоделци, со кои разговарал за економската состојба и проблемите со кои се соочуваат.
Филипче оцени дека граѓаните во услови на криза не добиваат доволно помош од власта. Како еден од проблемите го посочи растот на цената на горивото, која, според него, достигнала 105 денари за литар.
„Граѓаните ги споделуваат со нас секојдневните проблеми огромни, натрупани, без никаква грижа и помош од власта“, рече Филипче, посочувајќи ги пензионерите со најниски пензии, социјално загрозените лица, семејствата со многу деца и граѓаните кои примаат минимална плата.
Тој истакна дека СДСМ во Собранието предложил зголемување на минималната плата на 600 евра, како и финансиска поддршка за земјоделците погодени од кризата.
„Разговаравме за нашите предлози во Собранието, предлог Закон за зголемување на минималната плата од 600 евра и предлог Закон за финансиска поддршка во оваа криза во која се наоѓа земјоделството“, изјави Филипче.
Тој повика власта да ги разгледа предложените мерки и да одговори на барањата на граѓаните и земјоделците.
