(Видео) Француските демонстранти се фалат со украдената стока на TikTok: „Ја згазивме полицијата“

По насилните протести што викендов ја зафатија Франција, се проценува штетата од грабежите и уништувањето на имотот, која достигнува стотици милиони евра. Повеќе од 2.000 продавници биле ограбени или уништени, а француската влада се соочува со критики поради неуспехот да го спречи ширењето на насилството.

Во меѓувреме, дел од младите учесници во грабежите објавуваат снимки на „ТикТок“ и на мрежата Икс, фалејќи се со украдените предмети и судирите со полицијата, пишува „Еуроњуз“.

На една од снимките, млад човек го користи жаргонскиот назив за Париз и им се заблагодарува на своите соучесници, тврдејќи дека направиле хаос. Потоа се фали со украдените предмети и новата спортска облека, а на крајот им порачува на припадниците на интервентната полиција дека ги победиле.

— реклама —

Друг учесник во немирите изјавил дека на протестите се приклучил поради високите цени на горивата, кои ја погодуваат неговата мајка. Признал дека од продавница за спортска опрема украл облека и други производи, оправдувајќи го својот чин со зборовите дека на тој начин заштедува пари. Тој ја обвинил Франција за расизам и тврдеше дека претходно бил избркан од ресторан во кој, според него, на Французите им било дозволено да влезат.

Францускиот министер за внатрешни работи, Лоран Нунез, призна дека безбедносните сили во одреден момент ја изгубиле контролата врз ситуацијата. Тој потврди дека во саботата низ земјата биле распоредени околу 60.000 полицајци и жандарми, но дека нивниот број не бил доволен за справување со бројните групи учесници во немирите и грабежите.

— реклама —

Нунез изјави дека, со оглед на причинетата штета, сметал дека треба да поднесе оставка, но претседателот Емануел Макрон не ја прифатил.

— реклама —

Протестите поради високите трошоци за живот, на кои во саботата се собрале околу половина милион луѓе, прераснале во еден од најтешките бранови насилство во Франција во последните години. Во Париз, маскирани лица провалувале во продавници и однесувале цигари, очила за сонце, облека, накит и храна. Во некои маркети биле украдени и алкохолни пијалаци, додека од златарница исчезнале стари часовници.

Претседателот на Стопанската комора, Ален Ди Крешенцо, соопшти дека биле погодени повеќе од 2.000 продавници низ земјата, а вкупната штета се проценува на стотици милиони евра.

Во немирите биле уапсени повеќе од 2.500 лица, додека речиси 1.000 припадници на безбедносните сили биле повредени. Повредени имало и меѓу демонстрантите, а еден од нив се здобил со тешка повреда на раката од полициска шок-бомба.

Министерот за правда, Жералд Дарманен, соопшти дека во текот на викендот биле приведени повеќе од 2.330 лица, од кои 70 отсто биле полнолетни.