Големи редици, турканици и полициска интервенција биле забележани пред продавниците на „Лидл“ низ Франција, откако трговскиот синџир понудил околу 200.000 вентилатори и преносни клима-уреди по значително пониски цени.
Уште од раните утрински часови стотици граѓани чекале пред маркетите за да обезбедат еден од уредите, а на некои локации чекањето траело и повеќе од два часа. Во дел од продавниците поради големата гужва интервенирала и полицијата за да воспостави ред.
На социјалните мрежи се појавија снимки на кои се гледа како купувачите трчаат кон полиците, се туркаат и се натпреваруваат кој прв ќе стигне до производите. Во Нантер, западно од Париз, во метежот бил оштетен и влезот на една продавница.
Зголемената побарувачка доаѓа во пресрет на новиот топлотен бран што се очекува во Франција, откако неодамна температурите во делови од земјата надминаа 40 Целзиусови степени.
Преносните клима-уреди што „Лидл“ ги понуди по цена од 179 евра се значително поевтини од повеќето слични модели на пазарот, што дополнително ја зголеми заинтересираноста кај граѓаните.
